Financial Literacy : आजवर आपल्याकडे अर्थसाक्षरता हा अत्यंत दुर्लक्षित आणि तितकाच चुकीच्या गृहीतकांवर आधारित असलेला विषय बनला आहे. ह्याचे महत्व अनेकदा लक्षात येऊन पण अर्थसाक्षर होण्यास पुढाकार घेतला जात नाही. अर्थसाक्षरता म्हणजे वैयक्तिक वित्तविषयक माहिती आणि प्रभावी आर्थिक निर्णय घेण्यासाठी आवश्यक असलेले ज्ञान आणि कौशल्ये. ह्यामध्ये थोडक्यात महत्वाच्या गोष्टी सांगायच्या झाल्या तर अर्थसंकल्प (Budget), बचत (Saving), गुंतवणूक (Investment), क्रेडिट (Credit) आणि कर्ज (Loan) ह्या सर्व प्रकारातले आर्थिक संकल्पना समजून त्याचे व्यवस्थापन करण्यास सक्षम होणे. ह्याच प्रकाराला अर्थसाक्षर होणे म्हणतात.
चांगली अर्थसाक्षर व्यक्ती असल्यास अनेक फायदे होऊ शकतात. उदाहरणार्थ, चांगले आर्थिक निर्णय घेण्यास, आर्थिक ताण कमी करण्यास आणि भविष्याच्या दृष्टीने आर्थिक कल्याण करण्यास मदत करू शकते. अर्थसाक्षर असणाऱ्या व्यक्तींना ज्यादा व्याजदर, कमी व्याजाने कर्ज वगैरे गोष्टी आकर्षित करत नाहीत. अश्या वरवर सोप्या दिसणाऱ्या आणि नंतर अडचणीत आणणाऱ्या गोष्टी, घोटाळे टाळण्यास अर्थसाक्षर माणसे समर्थ असतात.
याव्यतिरिक्त, दीर्घकालीन आर्थिक नियोजनासाठी अर्थसाक्षरता अत्यंत महत्त्वाची आहे. बचत कशी करावी आणि हुशारीने गुंतवणूक कशी करावी हे समजून घेऊन, अर्थसाक्षर व्यक्ती संपत्ती निर्माण करू शकतात आणि घर खरेदी करणे, व्यवसाय सुरू करणे किंवा आरामात निवृत्त होणे यासारखी आर्थिक उद्दिष्टे साध्य करणे सुलभ बनते.
खरंतर अर्थविषयक साक्षरता हे एक महत्त्वाचे जीवन कौशल्य आहे. स्मार्ट आर्थिक निर्णय घेण्यासाठी आणि कायमस्वरूपी आर्थिक सुरक्षितता प्राप्त करण्यासाठी प्रत्येकाने अर्थसाक्षर होणे आवश्यक आहे.
